واصدري اللي تعبّى من كبار الهموم
اجتاحه الضيق لو هو كان قبل بسعه
اصبر واكافح واسلّي خاطري كل يوم
واصنع لي اعذار لو كانت ماهي مقنعه
والله يابو سيف مالي في المشاكل لزوم
لكنّ لن كان ماطاعك زمانك طعه
عواصف الوقت نالت من قوي العزوم
ماخلته لين ذاق الضربة الموجعة
صديت واغلقت سمعي عن هزال العلوم
هرجٍ يجيب المرض للي يبي يسمعه
من طاح من عيني الله يجعله مايقوم
اشره عليّه ليا مني نويت ارفعه
انا سليل القروم ومحتزم بالقروم
مالي ومال الضعوف وخوة المنفعه
لحومنا طمعة اللي ياكلون اللحوم
حنا بشر من متى ولحومنا مطمعه
خباثة النفس تستدرج لسان النموم
يبلع من لحوم خلق الله ولا تشبعه
الله يسلم رجالٍ يحفظون السلوم
وصدوراً مشرعه وابواباً مشرّعه
ولا العوافي تطول وتنقطع ماتدوم
يامسرع العمر مهما طال يامسرعه
لاترجي اللي يسرّك من عيال الرخوم
الشرّ من منبعه والخير من منبعه
#رائد_العالي